होटलको वाइफाइ प्रयोग गर्दै हुनुहुन्छ ? माइक्रोसफ्टले दियो ह्याकिङको चेतावनी

काठमाडौं । सार्वजनिक वाइफाइ प्रयोग गर्ने यात्रुहरूलाई लक्षित गर्दै साइबर आक्रमण बढिरहेको भन्दै माइक्रोसफ्टले विशेष सावधानी अपनाउन आग्रह गरेको छ । कम्पनीका अनुसार रुससँग आबद्ध एक ह्याकर समूहले होटल तथा सम्मेलनस्थलका वाइफाइ नेटवर्कमार्फत प्रयोगकर्ताको लगइन विवरण चोरी गर्ने र डिभाइसमा मालवेयर स्थापना गर्ने अभियान सञ्चालन गरिरहेको छ ।

माइक्रोसफ्टको पछिल्लो थ्रेट इन्टेलिजेन्स प्रतिवेदनअनुसार 'क्याप्टिभ क्रन्च' नाम दिइएको यो साइबर अभियान होटल, सम्मेलन केन्द्र तथा अन्य आतिथ्य सेवामा प्रयोग हुने वाइफाइ लगइन (क्याप्टिभ पोर्टल) प्रणालीलाई लक्षित गरेर सञ्चालन भइरहेको छ । कम्पनीले विशेष गरी व्यापारिक यात्रामा रहेका माइक्रोसफ्ट ३६५ प्रयोगकर्तालाई सार्वजनिक इन्टरनेट प्रयोग गर्दा अतिरिक्त सतर्कता अपनाउन आग्रह गरेको छ ।