दलभित्रको असन्तुष्टि मिलाउन मन्त्री बनाए, तर सरकार जोगाउन सकेनन्

धनगढी । सुदूरपश्चिम प्रदेशका मुख्यमन्त्री कमलबहादुर शाहले आफ्नै दल नेपाली कांग्रेसभित्र चर्किएको विवाद साम्य पार्न भन्दै गत जेठ २५ गते मन्त्रिपरिषद् पुनर्गठन गरे । असन्तुष्ट समूहलाई सरकारमै समेटेर तीन मन्त्री र दुई राज्यमन्त्री नियुक्त गरे । त्यसबेला मुख्यमन्त्री शाहले यसलाई पार्टीभित्र एकताको सन्देशका रूपमा प्रस्तुत गरेका थिए ।

नवनियुक्त मन्त्रीहरूले पनि बाँकी कार्यकालमा प्रदेशको विकासलाई गति दिने, बजेट प्रभावकारी बनाउने र नयाँ ढङ्गले काम गर्ने प्रतिबद्धता जनाएका थिए । मुख्यमन्त्री शाहको सङ्कट भने अन्त्य भएन । सत्तासाझेदार दलले समर्थन फिर्ता लिएसँगै उनी नेतृत्वको सरकार अल्पमतमा परेको छ । सरकार अल्पमतमा परेपछि दुई महिना अघि मन्त्री नियुक्त भएकाहरु सरकारबाट बाहिरिने निश्चितजस्तै भएको छ ।