उत्तर कोरियाली क्षेप्यास्त्र रुसमा तैनाथ भइरहेको युक्रेनको दाबी

किभ । युक्रेनको सैन्य गुप्तचर निकायले उत्तर कोरियाको क्षेप्यास्त्र इकाई रुसको पश्चिमी क्षेत्रमा तैनाथ हुन थालेको दाबी गरेको छ । युक्रेनी अधिकारीहरूले उक्त इकाई युक्रेनविरुद्धको युद्धमा प्रयोग हुन सक्ने जनाएका छन् ।

सो इकाईमा करिब १२० वटा ब्यालिस्टिक क्षेप्यास्त्र र ६ वटा प्रक्षेपण प्रणाली परिचालन हुन सक्ने जनाइएको छ । युक्रेनको मुख्य सैन्य गुप्तचर निर्देशनालयका अधिकारी एन्ड्री चेर्नियाकले रुसले उत्तर कोरियाली क्षेप्यास्त्र इकाईलाई पश्चिमी रुसको भोरोनेज क्षेत्रमा रहेको ११२औँ क्षेप्यास्त्र ब्रिगेडअन्तर्गत राख्ने योजना बनाएको बताएका छन् । उनका अनुसार उक्त इकाई मा करिब ९० जना उत्तर कोरियाली सैन्य कर्मचारी रहने सम्भावना छ ।