३ वर्षदेखि अवैध रूपमा रकम विदेश लैजाँदै एनसेल

काठमाडौं । एनसेलले सरकारको स्वीकृति नलिई विदेशी कर्मचारीलाई तलबलगायतका सेवा सुविधा भुक्तानीबापत मोटो रकम विदेश पठाएर कर छली गरिरहेको भेटिएको छ । बहुराष्ट्रिय कम्पनीले आफ्नो ग्रुप कम्पनी वा बाह्य प्राविधिक सेवा प्रदायकसँग प्रविधि व्यवस्थापन सेवा सम्झौता (टेक्नोलोजी म्यानेजमेन्ट सर्भिस एग्रिमेन्ट, टिएमएसए) गरेर विशेषज्ञ जनशक्तिलाई काम लगाउन पाउने व्यवस्था छ ।

एनसेल आजियाटाले प्रविधि व्यवस्थापन सेवा सम्झौतामार्फत विदेशी कर्मचारीका लागि तलब लगायतका सेवा सुविधा भुक्तानी गर्दै आएको थियो । तर १ डिसेम्बर २०२३ देखि उद्योग विभागले एनसेललाई प्रविधि व्यवस्थापन सेवा सम्झौताअनुसार नियुक्त भएका कर्मचारीको तलबलगायतका सुविधा विदेश लैजाने अनुमति सम्झौतालाई मान्यता दिएको छैन ।