अक्षरमा उनिएको कूटनीतिक गन्तव्य

नेपालमा अमेरिकी, भारतीय, रुसीलगायत विभिन्न विदेशी कूटनीतिक नियोगले पुस्तकालय र सूचना केन्द्र सञ्चालन गर्दै आएका छन्। यी पुस्तकालयलाई ‘सफ्टपावर’ अर्थात् नम्र शक्ति र सांस्कृतिक कूटनीतिका प्रभावकारी माध्यमका रूपमा पनि बुझ्न सकिन्छ।

कुटनीतिक नियोगअन्तर्गत सञ्चालित पुस्तकालयको भूमिका सामान्य पुस्तकालयको भन्दा व्यापक हुन्छ। विभिन्न देशका दूतावास तथा अन्तर्राष्ट्रिय संस्थाले सञ्चालन गरेका यस्ता पुस्तकालय सम्बन्धित देशको भाषा, साहित्य, संस्कृति, इतिहास, शिक्षा, विज्ञान तथा समसामयिक विषयबारे जानकारी दिने माध्यम मात्र नभई दुई देशबीच ज्ञान, विचार र संस्कृतिको आदानप्रदान गर्ने महत्वपूर्ण थलो पनि हुन्।