कोशी प्रदेशमा बर्डफ्लु सङ्कट

विराटनगर । कोभिड महामारी, आर्थिक मन्दी र दानाको बढ्दो मूल्यका कारण यसै पनि सङ्कटमा गुज्रिरहेको कोशी प्रदेशको पोल्ट्री (कुखुरापालन) व्यवसायमा बर्डफ्लु सङ्क्रमणले थप सङ्कट निम्त्याएको छ । चैत महिनादेखि झन्डै २ महिनासम्ममा प्रदेशका तीन जिल्ला मोरङ, सुनसरी र झापामा बर्डफ्लुका कारण किसानका ४ लाखभन्दा बढी कुखुरा नष्ट गरिएका छन् भने ५० करोड रुपैयाँभन्दा बढीको आर्थिक क्षति भएको छ ।

कोशी प्रदेश सरकार उद्योग, कृषि तथा सहकारी मन्त्रालयकी फोकल पर्सनसमेत रहेकी पशुपन्छी विकास महाशाखाकी वरिष्ठ पशु चिकित्सक डा. दीपा दिवालीले क्षतिको विवरण सङ्कलन गरेर संघ सरकारलाई पठाइएको बताइन् ।