काठमाडौँका होटल र रेष्टुरेन्टमा धुमपान नियन्त्रण गर्न प्रशासनको निर्देशन

काठमाडौँ। जिल्ला प्रशासन कार्यालय काठमाडौँले जिल्लाभित्र सञ्चालित होटल तथा रेष्टुरेन्टहरूमा धुम्रपानसम्बन्धी कानूनी व्यवस्था कडाइका साथ पालना गर्न व्यवसायीहरूलाई आग्रह गरेको छ।

कार्यालयले आज जारी गरेको अत्यन्त जरुरी सूचनामार्फत होटल तथा रेष्टुरेन्टहरूमा अव्यवस्थित रूपमा हुक्का, चुरोटलगायतका सुर्तीजन्य पदार्थको सेवन हुने गरेको र त्यसले धुम्रपान नगर्ने अन्य व्यक्तिहरूको स्वास्थ्यमा प्रतिकूल असर पारेको गुनासो बढेपछि यस्तो कदम चालिएको जनाएको छ। प्रचलित कानूनको पालना नभएको गुनासो आएपछि सुर्तीजन्य पदार्थ (नियन्त्रण तथा नियमन गर्ने) ऐन, २०६८ को व्यवस्थालाई प्रभावकारी रूपमा कार्यान्वयन गर्न निर्देशन दिइएको हो।