अवकाशमा जान लागेका कटवाललाई कर्मचारी सञ्चय कोषको प्रशासक बनाउने तयारी

कर्मचारी सञ्चय कोषको नयाँ प्रशासक नियुक्ति प्रक्रिया अन्तिम चरणमा पुगेका बेला अर्थ मन्त्रालयले केही दिनमै अनिवार्य अवकाशमा जान लागेका सहप्रशासक जीवनकुमार कटवाललाई पाँच वर्षका लागि प्रशासक नियुक्त गर्ने तयारी गरेको छ।

सुशासनको नारा दिएर विभिन्न निकायमा आफ्ना मानिस भर्ना गर्दै आएको सरकारले कटवाललाई कोषको प्रशासक बनाउन यस्तो तयारी गरेको भन्दै आलोचना हुन थालेको छ। यसअघि यस्तै प्रकृतिका नियुक्ति दुई पटक विवादमा परेर सरकारले बिचैमा प्रशासक हटाउनुपरेकाले अहिलेको निर्णय पनि अदालतसम्म पुग्ने संभावना देखिएको छ।