निजी क्षेत्रमैत्री बन्न महालेखा र सार्वजनिक निकायलाई चेम्बर अफ कमर्सका अध्यक्ष अग्रवालको आग्रह

काठमाडौं- नेपाल चेम्बर अफ कमर्सका अध्यक्ष कमलेश अग्रवालले सार्वजनिक निकायहरू निजी क्षेत्रमैत्री बन्नुपर्नेमा जोड दिएका छन्। उनले आर्थिक सुशासन र पारदर्शिताका लागि महालेखा परीक्षकको कार्यालयको भूमिका महत्त्वपूर्ण भए पनि निजी क्षेत्रको मनोबल उच्च राख्ने गरी कार्यशैली अपनाउनुपर्ने बताएका हुन्।

नेपाल अडिटर्स एसोसिएसन (अडान) को वार्षिकोत्सव समारोहलाई सम्बोधन गर्दै अध्यक्ष अग्रवालले नियामक निकायहरूले फर्स्यौट गरिसकेका विषयमा महालेखा परीक्षकको कार्यालयबाट पुनः प्रश्न उठाइँदा निजी क्षेत्र निरुत्साहित हुने गरेको बताए। आन्तरिक राजस्व विभागजस्ता निकायबाट अनुपालन पूरा भइसकेका विषयमा दोहोरो परीक्षणले व्यवसायीको आत्मविश्वास कमजोर बनाउने उनको भनाइ थियो।