नारायणी अस्पतालका मेसु सर्वोत्तम अस्पतालमा पनि

केही दिनअघि देशैभरिका चिकित्सकलाई हडतालमा उतार्ने वीरगन्जको नारायणी अस्पतालमा खासै सुधार देखिएको छैन। अस्पताल सुधारको जिम्मा लिएका निमित्त मेसु चितरञ्जन शाहले नियमविपरीत निजी अस्पतालमा समय दिइरहेको पाइएपछि अस्पताल सुधार हुन नसकेको रहस्य खुलेको छ। नारायणी मधेस प्रदेशकै एक प्रमुख संघीय र धेरै बिरामीको चाप हुने अस्पताल हो।

शाह वीरगन्जको पानीटंकी क्षेत्रस्थित सर्वोत्तम अस्पतालमा कार्यरत रहेको पाइएको छ। पथरी तथा मूत्ररोग विशेषज्ञ रहेका डा. चितरञ्जनसँग जचाउन बुधबार पर्साका अठराहा सुगौलीनिवासी वीरेन्द्र पण्डित पुगेका थिए। उनले सात सय रुपैयाँ तिरेर सर्वोत्तम अस्पतालको ओपिडीको टिकट काटी डा. चितरञ्जनसँग जचाएका थिए। किडनीमा पथरी भएको अन्य डाक्टरबाट जानकारी पाएपछि आफू यहाँ आएको पण्डितले बताए। डा. शाहसँग समस्या सुनाएपछि उनले रगत र पिसाब जाँच र अल्ट्रासाउन्ड गराएर ल्याउन पुर्जीमा लेखी सुझाएको पण्डितले बताए।