अस्पतालमा हुने हरेक मृत्यु ‘लापरबाही’ !

मध्यरातको समय छ, अस्पतालको आकस्मिक कक्षमा एक चिकित्सक विगत १२ घण्टादेखि लगातार बिरामीको उपचारमा व्यस्त छन् । बाहिर आफन्तहरू चिन्ताले छटपटाइरहेका देखिन्छन, चिकित्सक र स्वास्थ्यकर्मीले आफ्नो सम्पूर्ण ज्ञान, सीप र प्रयास लगाउँदा धेरै बिरामी निको भइरहेका छन् । कुनै एक बिरामी सिकिस्त अवस्थामा ल्याइएको हुन्छ । बिरामीको अवस्था झन जटिल बन्छ र मृत्यु हुन्छ ।

सोही अस्वस्थाको बारेमा जानकारी दिँदै गर्दा पीडा, आक्रोश र निराशाको अवस्थामा रहेका केही व्यक्तिको रिस उपचार प्रक्रियाको वास्तविकताभन्दा चिकित्सकप्रति लक्षित हुन्छ । केही बेरमै गालीगलौज, हातपात र तोडफोड सुरु हुन्छ । जीवन बचाउन खटिएकाहरूलाई आफ्नै ज्यानको सुरक्षा गर्न कठिन हुने अवस्था आउँछ ।