राजेश हमाल भन्छन्: लोकतन्त्रमा प्रदर्शन होइन, विवेकको जित हुनुपर्छ

अभिनेता राजेश हमालले लोकतन्त्र, नेतृत्व, राजनीतिक स्थिरता र राष्ट्रिय हितबारे सामाजिक सञ्जालमार्फत लामो धारणा सार्वजनिक गर्दै नेपाललाई दलगत स्वार्थभन्दा माथि उठेर दूरदृष्टियुक्त नेतृत्व र बलियो लोकतान्त्रिक संस्कृतिको आवश्यकता रहेको बताएका छन्।

सुकरातको भनाइ उद्धृत गर्दै हमालले लोकतन्त्रको सुन्दरता जनमतमा भए पनि त्यसको सबैभन्दा ठूलो चुनौती पनि त्यहीँ लुकेको उल्लेख गरेका छन्। उनका अनुसार लोकतन्त्रमा धेरैजसो बुद्धिमत्ताभन्दा प्रदर्शन, डर, अहंकार र क्षणिक सन्तुष्टिलाई प्राथमिकता दिने प्रवृत्ति हाबी हुने गरेको छ, जसका कारण जटिल समस्याका अत्यन्त सरल समाधानको आश्वासन दिनेहरू लोकप्रिय बन्ने अवस्था सिर्जना हुन्छ।