कोसी बाढीपीडित: १८ वर्ष बित्दा पनि मिलेन क्षतिपूर्ति

सप्तकोसी नदीको कटान र बाढीबाट पीडित धर्मेन्द्रकुमार कर्णले १८ वर्ष बित्दा पनि क्षतिपूर्ति पाएका छैनन्। सुनसरीको कोसी गाउँपालिकाको बस्तीमा १८ वर्षअघि सप्तकोसीको बाढी पसेर क्षति पुर्‍याएको थियो। ‘नदीले जग्गामा पुर्‍याएको क्षतिको शोधभर्ना अहिलेसम्म पाएको छैन। क्षतिपूर्ति पाइन्छ भन्ने आशामा बसेको छु’, कर्णले भने।

बढीले क्षति पुर्‍याएको जग्गा उनकी आमा चन्द्रकलादेवी कायस्थको नाममा छ। बेलाबखत प्रशासन कार्यालयमा क्षतिपूर्तिका लागि सम्पर्क गरे पनि विश्वासिलो जवाफ नपाएको उनको गुनासो छ। बाढीले उनको खेतीयोग्य जग्गामा गेगर थुपारेर क्षति पुर्‍याएको थियो। उनले अरू जग्गाको क्षतिपूर्ति पाए पनि आमाका नाममा रहेको उक्त जग्गाको क्षतिपूर्ति पाउन नसकेको बताए। त्यतिबेला जग्गाको क्षतिपूर्ति सीमा विवादका कारण रोकिएको थियो। विवाद टुंगिएको निकै भइसक्यो तर क्षतिपूर्ति पाउन नसकेको कर्णले बताए।