रसुवागढी सीमा नाका दुई दिनका लागि बन्द, नेपाल–चीन व्यापार र आवतजावत ठप्प

नेपाल र चीनबीचको प्रमुख व्यापारिक स्थल रसुवागढी सीमा नाका दुई दिनका लागि पूर्ण रूपमा बन्द गरिएको छ। चिनियाँ पक्षको आन्तरिक व्यवस्थापन तथा प्राविधिक तयारीका कारण नाका बन्द गरिएको रसुवा भन्सार कार्यालयले जनाएको छ। अचानक नाका बन्द भएपछि नेपाल-चीनबीच भइरहेको नियमित द्विदेशीय व्यापार, मालवाहक कन्टेनरहरूको आवतजावत र सर्वसाधारणको आवतजावतमा अस्थायी रूपमा गम्भीर असर परेको छ।

उत्तरी नाका दुई दिनसम्म ठप्प हुने भएपछि चीनबाट नेपालतर्फ आउँदै गरेका करोडौँ मूल्यका सामान बोकेका सयौँ मालवाहक कन्टेनरहरू तिब्बतको केरुङ र सीमा क्षेत्रमै रोकिन पुगेका छन्। विशेष गरी तयारी पोशाक, इलेक्ट्रोनिक्स सामान, जलविद्युत् आयोजनाका उपकरण र फलफूल बोकेका गाडीहरू रोकिएका कारण नेपाली व्यवसायीहरू मारमा परेका छन्। भन्सार पास नहुँदा राजश्व संकलनको दैनिक लक्ष्यमा समेत यसले आंशिक प्रभाव पारेको छ।