शिक्षक महासंघद्वारा भदौदेखि आन्दोलनको घोषणा

काठमाडौँ। नेपाल शिक्षक महासंघले आफ्ना विभिन्न शैक्षिक तथा पेसागत मागहरू पूरा गराउन आगामी भदौ महिनादेखि आन्दोलन गर्ने घोषणा गरेको छ। साउन १६ र १७ गते काठमाडौँमा सम्पन्न महासंघको तेस्रो राष्ट्रिय परिषद् बैठकका १५ बुँदे निर्णयहरू शुक्रबार पत्रकार सम्मेलनमार्फत सार्वजनिक गर्दै महासंघले आन्दोलनको तयारी अघि बढाएको जानकारी दिएको हो।

महासंघका अध्यक्ष लक्ष्मीकिशोर सुवेदीका अनुसार आन्दोलनको ठोस मिति र कार्यक्रम तय गर्ने अधिकार विस्तारित कार्यदलीय बैठकलाई प्रत्यायोजित गरिएको छ। महासंघले विगतका सहमति कार्यान्वयन, गुणस्तरीय विद्यालय शिक्षा ऐन जारी गर्नुपर्ने, बालविकास शिक्षक, विद्यालय कर्मचारी र सिकाई अनुदानका शिक्षकलाई तलब वृद्धि तथा पोसाक/महङ्गी भत्ता उपलब्ध गराउनुपर्ने माग अघि सारेको छ।