आफू बाँचेको समाजका कुराहरू लेख्नुपर्छ भनेर ‘एउटा मायी नगरमा’ लेखेँ

समकालीन नेपाली साहित्य क्षेत्रमा सुपरिचित नाम हो, रमेश क्षितिज । क्षितिज ४० को दशकपछिका सशक्त साहित्यकार हुन् । मूलतः कविता विधामार्फत नेपाली साहित्यमा चिनिएका उनी गीत लेखन तथा कथा लेखनमा पनि त्यत्तिकै सक्रिय छन् ।

सन् १९६९ मा सल्यान जिल्लामा जन्मिएका क्षितिजको बाल्यकाल भने दाङको हेकुलीमा बित्यो । ४ कक्षामा पढ्दादेखि नै कविता लेख्न थालेका उनले ६ कक्षामा पुग्दासम्म नाटक लेख्न थाले । २०४७ सालमा क्षितिजले लेखेको गीत ‘तिर्खाएको काकाकुलसरी भएँ, कुनै नमीठो भुलसरी भएँ' पहिलोपल्ट रेडियो नेपालमा रेकर्ड भयो, जुन गीत राजेशपायल राईले गाएका थिए ।