नेताका नामका भवन मर्मत गर्न ११ करोड

सरकारले चालु आर्थिक वर्ष २०८३/८४ मा चार शीर्ष नेता बिपी कोइराला, मदन भण्डारी, कृष्णप्रसाद भट्टराई र गजेन्द्रनारायण सिंह स्मृति भवनको मर्मत तथा सम्भार गर्न ११ करोड रुपैयाँ बजेट छुट्याएको छ।

उक्त बजेट संस्कृति, पर्यटन तथा नागरिक उड्डयन मन्त्रालयमार्फत छुट्याइएको हो। ती चार भवन पर्यटकीय केन्द्र र ऐतिहासिक महत्त्वपूर्ण भवन भएकाले मर्मत–सम्भार गर्न बजेट विनियोजन गरिएको मन्त्रालयका प्रवक्ता जयनारायण आचार्यले बताए। ‘पर्यटकीय तथा ऐतिहासिक दृष्टिकोणले महत्त्वपूर्ण मानिएका भवनको मर्मत तथा सम्भार गर्नु सरकारको काम हो,’ आचार्यले भने। उनका अनुसार उक्त बजेट अझै कार्यान्वयनमा आएको छैन। ‘तर कसैले विनियोजन गरिएको बजेट लिन अस्वीकार गरे उक्त रकम अन्य शीर्षकमा रकमानन्तर हुन्छ या फ्रिज हुन्छ,’ उनले भने।