एमाले, कांग्रेस र नेकपाका जनप्रतिनिधिको विवादले धरानको बजेट अझै आएन

सुनसरी : सुनसरीको धरान उपमहानगरपालिकामा एमाले, कांग्रेस र नेकपाबाट निर्वाचित जनप्रतिनिधिबीचको विवाद चर्किदा चालु आर्थिक वर्ष २०८३/८४ को बजेट अझै आउन सकेको छैन । कानुनअनुसार असार १० गतेभित्र चालु आर्थिक वर्षको बजेट नगरसभामा पेस गरी असार मसान्तसम्म पास गरी बजेट कार्यान्वयन गर्नुपर्ने भए पनि डेढ महिना बितिसक्दा समेत धरान उपमहानगरपालिकाले बजेट ल्याउन सकेको छैन ।

बजेट निर्माण तथा नगरसभा सञ्चालनका विषयमा कार्यबाहक मेयर अईन्द्रविक्रम बेघा र एमालेबाट निर्वाचित धरान–१५ का वडाध्यक्ष नरेश इवारम तथा कांग्रेसबाट निर्वाचित धरान–१८ का वडाध्यक्ष प्रवीण राईबीच देखिएको विवादका कारण बजेट प्रक्रिया प्रभावित भएको हो । तीनै जनाबीचको विवाद अहिले व्यक्तिगत असहमतिभन्दा माथि उठेर उपमहानगरपालिकाको नीति, कार्यक्रम र बजेट पारित गर्ने प्रक्रियामै असर पर्ने अवस्थामा पुगेको छ ।