पहिरोले अवरुद्ध सडक जनश्रमदानबाट सञ्चालनमा

सुनसरी : लगातारको वर्षापछि पहिरो खसेर अवरुद्ध बनेको खोटाङको साकेला गाउँपालिका–३ स्थित ढाडे–मानेभञ्ज्याङ सडक स्थानीयवासीले श्रमदानमा जुटेर पछि पुनः सञ्चालनमा ल्याएका छन् । सडकमा पहिरोसहित माटो र हिलो थुप्रिएपछि केही समयदेखि आवागमन प्रभावित बनेको थियो। वर्षाका कारण थप पहिरो जाने र सडकमा पानी जम्ने जोखिम समेत बढेपछि गाउँपालिका जनप्रतिनिधि, कर्मचारी र स्थानीयवासीहरु तत्काल सडक खुलाउन श्रमदानमा जुटेका थिए ।

शुक्रबार ‘साकेला श्रम अभियान’ अन्तर्गत सडकमा सामुहिक श्रमदान गरिएको थियो । गाउँपालिका अध्यक्ष रवि प्रकाश राईको नेतृत्वमा भएको श्रमदानमा वडा नं. ३ का अध्यक्ष गोविन्द तामाङसहित जनप्रतिनिधि, कर्मचारी, राजनीतिकर्मी र स्थानीयवासी सहभागी भएका थिए । श्रमदानका क्रममा सडकमा थुप्रिएको पहिरो, माटो र हिलो हटाउनुका साथै सडक किनारमा पुरिएका तथा अवरुद्ध भएका नाली सफा गरिएको थियो । नाली खुलेपछि वर्षाको पानीको निकास सहज हुने र सडकमा पानी जमेर थप क्षति हुने सम्भावना कम हुने अपेक्षा गरिएको छ ।