बीपीको वैचारिक कांग्रेसमा विरासतको मोलतोल

पृष्ठभूमि

आज बीपी कोइराला जीवित हुनुहुन्थ्यो भने नेपाली कांग्रेसको वर्तमान संकटलाई कसरी हेर्नुहुन्थ्यो ? के उहाँ कुनै गुटको पक्षमा उभिनुहुन्थ्यो वा आफ्नै जीवनभर स्थापित गरेको लोकतान्त्रिक विधि, महाधिवेशन र संस्थागत संस्कृतिको पक्षमा रहनुहुन्थ्यो ? यो प्रश्न केवल एउटा राजनीतिक कल्पना होइन; नेपाली कांग्रेसको वर्तमान संकट बुझ्ने सबैभन्दा महत्वपूर्ण वैचारिक कसी पनि यही हो । नेपाली कांग्रेस आज फेरि एकपटक गम्भीर मोडमा उभिएको छ । एउटा पक्ष नियमित महाधिवेशनको कार्यतालिका अनुसार अघि बढिरहेको छ भने अर्काेपक्ष विशेष महाधिवेशनबाट निर्वाचित नेतृत्वलाई वैधानिक र वैचारिक निरन्तरताको रूपमा प्रस्तुत गरिरहेको छ । यो विवाद पार्टीको आन्तरिक छलफलमा मात्र सीमित रहेन ।