सभ्यताको मूल जरो ‘तोरकीन’

उपन्यासको नाम ‘तोरकीन’ले नै मेरो पुस्तकप्रति आकर्षण बढेको थियो । त्योभन्दा ठूलो कुरा लेखकको नाम क्षितिज समर्पणले पनि मलाई त्यसप्रति तानेको थियो । तसर्थ, उपन्यास बजारमा आएको केही समयपछि गत दशैंमा नै मेरो हातमा परेको भए पनि समयको व्यस्तताका कारण त्यसलाई अध्ययन गर्न सकेको थिएन । यद्यपि स्नातक तह सातौं सत्रको परीक्षापश्चात् त्यो जिज्ञासालाई मेटाउने अवसर प्राप्त भयो ।

क्षितिज समर्पण कर्णाली प्रदेशको जाजरकोट जिल्लामा जन्मिएका हुन् । उनी नेपाली साहित्यकार, गीतकार र पत्रकार हुन् । प्रारम्भमा विशेषगरी गीत, गजलमा देखिएता पनि तोरकीन उपन्यासमार्फत आफूलाई आख्यानकारका रूपममा उभ्याएका छन् । उनका ‘आगोका फुलहरू’ (२०६७) एकल गजल संग्रह र ‘कैफियत’ (२०७०) संयुक्त गजल सङ्गह पनि प्रकाशित छन् । एकदशक लामो समयदेखि पत्रकारितामा सक्रिय समर्पणले रेडियो र सडक नाटक हुँदै म्युजिक भिडियोमा पनि अभिनय गरिसकेका छन् ।