४१८ किलो गाँजासहित चार जना पक्राउ

सुनसरी : सुनसरीको बराह क्षेत्रबाट प्रहरीले ४१८ किलो प्रतिबन्धित लागुऔषध गाँजासहित चार जनालाई पक्राउ गरेको छ । प्रहरीले गाँजा ओसारपसारमा प्रयोग भएको एउटा कार र एउटा मोटरसाइकल समेत नियन्त्रणमा लिएको छ ।

सुनसरी बराहक्षेत्र नगरपालिका–९ स्थित बराहक्षेत्र–चतरा भित्री सडक खण्डमा लागूऔषध ओसारपसार भइरहेको भन्ने विशेष सूचनाका आधारमा इलाका प्रहरी कार्यालय महेन्द्रनगरबाट खटिएको प्रहरी टोलीले उनीहरूलाई पक्राउ गरेको हो । शनिबार बिहान ५ः३० बजे बराहक्षेत्रबाट चतरा आउँदै गरेको प्रदेश १–०२–००२ च ४६५१ नम्बरको कार र को ११ प ५६०९ नम्बरको मोटरसाइकल रोकेर चेकजाँच गरिएको थियो । कारभित्र २२ वटा प्लास्टिकका पोकामा प्याक गरिएको अवस्थामा प्रतिबन्धित लागूऔषध गाँजा बरामद गरिएको छ । बरामद गरिएको गाजा ४१८ किलो रहेको प्रहरीले जनाएको छ ।