पुराना उद्योग ब्युँताउनु हावादारी कुरा, सरकारले निजी क्षेत्रलाई प्रोत्साहन गर्नुपर्छ : राजेन्द्र लिङदेन

राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले सरकारले वर्षौँ पुराना तथा बन्द भएका उद्योगहरू पुनः सञ्चालनमा ल्याउनुलाई प्रगति मानेर खुसी हुनु हावादारी भएको बताएका छन्। शनिबार पत्रकारहरूसँग कुरा गर्दै लिङदेनले बन्द भएका उद्योगहरू चलाएर समृद्धि हासिल हुन्छ भन्नु कल्पनाबाहिरको विषय भएको बताएका हुन्।

‘त्यो पुस्ताबाट मैले चाहिँ कम्तीमा त्यो अपेक्षा गरेको थिएन कि अब हेटौँडा कपडा कारखाना चलाउँछु, अब गोरखकाली रबर उद्योग चलाउँछु, अब वीरगन्ज कृषि औजार कारखाना र जनकपुर चुरोट कारखाना चलाउँछु अनि त्यो नै उपलब्धि हो भनेर भन्छन् भन्ने मैले कल्पना गरेको थिएन। तर उहाँहरूले त्यही कुरा गर्नुभयो।’ उनले भने।