५७०० मिटरको सास रोकिने उकालो!

अपर मुस्ताङको दामोदर कुण्ड जाने मनमा लहर चलिरहेको थियो। मौनतामा नै थोरै योजनाहरू मनमनै बुन्दै थिएँ।

साउनको २६ मा हिँड्ने मनसाय ५ दिन अघि मात्र बनाएँ र साथी मिरा र शोभा पनि जाने कुरा भयो। यात्रा गर्नु अघि खासै कुनै पूर्वतयारी गर्न भ्याइएन, घरमै रहेका पुरानै सरसामान जुत्ता, चस्मा, ज्याकेट, रेनकोट, पन्जा, थर्मस, लौरो, ब्यागले काम चलाउने भएँ। केही चकलेट, ड्राइफ्रुट्सहरू, जीवनजल, सिटामोल, फ्लेक्जन, डाइमोक्स, सनस्क्रिन क्रिम, लिपगार्ड पनि घरमै भएकाले यसपालि केही किनमेल गरिनँ। योगा भने प्रातःकाल दैनिक २ घण्टा गर्थें नै, विशेष गरी अल्टिच्युडका लागि अनुलोम-विलोम र कपालभाती लाभकारी सिद्ध भयो।