भावुक हुँदै रेशम चौधरीले भने: पहिचान माग्दा जेल, हतकडी र नेल पायौँ

नागरिक उन्मुक्ति पार्टीका अध्यक्ष एवं पूर्वसांसद रेशम चौधरीले पहिचान र अधिकारका लागि संघर्ष गर्दा आफूहरूले जेल, हतकडी र नेलसम्म भोग्नुपरेको बताएका छन्। उनले लामो संघर्षका बाबजुद अधिकार सुनिश्चित हुन नसकेको भन्दै अब विभिन्न समुदाय र पहिचानबीच एकता आवश्यक रहेको बताएका छन्।

शनिबार काठमाडौंमा आयोजित अग्रगामी मोर्चा घोषणा सभालाई सम्बोधन गर्दै चौधरीले वर्तमान संविधान जारी हुँदा आफू थारुहट विद्रोहका कारण प्रवासमा रहेको स्मरण गरे। आफूहरूलाई प्रवासमा जान बाध्य पारेर जारी गरिएको संविधानमा आफ्नो समुदायको अधिकार नसमेटिएको उनको दाबी थियो।