जननेता मदन भण्डारीलाई सम्झँदा

केहि दिन अघि मात्रै हामीले जननेता मदन भण्डारीको जन्मदिन विभिन्न रूपमा मनायौँ । उहाँ जीवितै हुनुभएको भए अहिले ७५ वर्ष लाग्नुहुन्थ्यो । 'सिद्धान्त जीवनका लागि हो, जीवन सिद्धान्तका लागि होइन' भन्ने जीवनदृष्टिलाई आत्मसात् गर्ने महान् विचारक, नेपालको वामपन्थी आन्दोलन तथा समकालीन राजनीतिका सबैभन्दा प्रभावशाली, प्रेरणादायी एवं लोकप्रिय नेतामध्ये एक जननेता मदन भण्डारीप्रति सर्वप्रथम हार्दिक श्रद्धाञ्जली व्यक्त गर्दछु।

मदन भण्डारी केवल एउटा राजनीतिक नेता मात्र हुनुहुन्नथ्यो। नेपाली वाम आन्दोलनका एक उदाहरणीय व्यक्तित्व पनि हुनुहुन्थ्यो। उहाँले नेपाली वाम आन्दोलनलाई लोकतान्त्रिक दिशामा उन्मुख गराउन असाध्यै महत्त्वपूर्ण भूमिका खेल्नुभयो । त्यसका अलावा वाम आन्दोलनको क्रान्तिकारी, जुझारु र जनपक्षीय चरित्रलाई जोगाउँदै जनताको जनादेशका आधारमा स्थायी राजनीतिक शक्तिका रूपमा स्थापित गर्ने ऐतिहासिक भूमिका अमेत कुशलतासाथ निर्वाह गर्नुभयो।