बालबालिकालाई दलीय सदस्यता : बालअधिकार रक्षामा गम्भीर चुनौती

नेपालमा भएका राजनीतिक आन्दोलन र परिवर्तनका हरेक मोडमा युवा–विद्यार्थीको भूमिका अग्रपंक्तिमा छ। राणा शासनको अन्त्य, पञ्चायती व्यवस्थाविरुद्ध २०४६ सालको आन्दोलन, १० वर्षे द्वन्द्व र २०६२/६३ को आन्दोलनमा युवा–विद्यार्थीसँगै बालबालिकाले पनि राजनीति दलका झन्डा र पर्चाहरू बोकेका दृष्टान्त छन्।

तर मुलुकमा लोकतान्त्रिक गणतन्त्र स्थापना भई ‘विद्यालयलाई शान्तिक्षेत्र घोषणा’ गरिएको डेढ दशक भइसक्दा र बालबालिकाको अधिकार संरक्षणका लागि कडा कानुनहरू बन्दा पनि राजनीतिक स्वार्थका लागि बालबालिकालाई दलमा भर्ना गर्ने प्रवृत्ति अझै पूर्ण रूपमा रोकिन सकेको छैन। २०६८ साल जेठ ११ गते (२०११ मे २५) मा मन्त्रिपरिषद्ले बालबालिका र विद्यालयलाई शान्तिक्षेत्र घोषणा गरेको हो।