महाराजधिराज बन्न पुष्पको सिक्स प्याक

फिल्म महाराजधिराजका मुख्य कलाकार पुष्प खड्काले फिल्मका लागि गरेको कठोर मेहनत झल्किने सिक्स प्याक बडीसहितको तस्बिर सार्वजनिक गरिएको छ। फिल्मका प्रस्तुतकर्ता विराज विष्टले पुष्पको सिक्स प्याक बडीसहितको तस्बिर सार्वजनिक गर्दै उनले महाराजधिराजकै लागि कठोर मेहनत गरेर शरीर बनाएको बताएका छन्।

विराजले महाराजधिराज प्रदर्शनपछि पुष्पले नेपाली सिनेमा उद्योगमा १५ वर्ष फर्केर हेर्नु नपर्ने अवस्थासमेत आउने दाबी गरेका छन्। ‘महाराजधिराजको प्रदर्शनपछि साँच्चिकै पीके (पुष्प) ले नेपाली फिल्म उद्योगमा १५ वर्ष फर्केर हेर्नुपर्ने अवस्था आउँदैन’ विराजको भनाइ छ। पुष्प महाराजधिराजमा अनुबन्ध हुने कागजी सम्झौता गर्दासमेत चर्चामा आएका थिए। फिल्मको हाल काठमाडौँका विभिन्न स्थानमा छायाँकन भइरहेको छ। सुनसरीको श्रीलंका टापुबाट सुरु भएको फिल्मको छायाँकन सेड्युल ७० दिनको छ।