ग्यासको कालोबजारी रोक्न गृह र उद्योग मन्त्रालय सक्रिय, डिपोमा सादा पोसाकका प्रहरी खटाइँदै

काठमाडौं- खाना पकाउने एलपी ग्यासमा कृत्रिम अभाव सिर्जना गरी कालोबजारी भइरहेको गुनासो बढेपछि सरकारले काठमाडौं उपत्यकाका विभिन्न ग्यास डिपो तथा बिक्री केन्द्रमा निगरानी बढाउने भएको छ। गृह मन्त्रालय र उद्योग मन्त्रालयबीचको समन्वयमा आवश्यकताअनुसार सादा पोसाकमा प्रहरी परिचालन गरी ग्यासको आपूर्ति तथा बिक्री वितरणको अवस्थाबारे निगरानी गरिने भएको हो ।

भारतबाट नेपालमा ग्यास आयातमा कुनै समस्या नरहेको अवस्थामा पनि बजारमा एकाएक ग्यास अभाव देखिन थालेपछि उपभोक्ताबाट उद्योग मन्त्रालयमा लगातार गुनासा तथा सूचना आउन थालेका छन् । आपूर्ति सहज हुँदाहुँदै पनि केही व्यवसायीले कृत्रिम अभाव सिर्जना गरी उपभोक्तालाई बढी मूल्यमा ग्यास बिक्री गरिरहेको आशंका बढेपछि उद्योगमन्त्री गौरी यादवले यस विषयमा चासो लिएका हुन् ।