सामान्य सुधारलाई सरकारले ‘चमत्कार’ मान्यो: सभापति थापा

नेपाली कांग्रेसका सभापति गगन कुमार थापाले सरकारले सार्वजनिक संस्थाको वास्तविक समस्या समाधान गर्नुको सट्टा सामान्य सुधारलाई ‘चमत्कार’ को रूपमा प्रस्तुत गरिरहेको बताएका छन्। कांग्रेस केन्द्रीय कार्यसमितिको बैठकमा बोल्दै थापाले सार्वजनिक संस्थामा करिब ६ खर्ब रुपैयाँ लगानी रहे पनि त्यसअनुसार प्रतिफल आउन नसकेको र घाटामा रहेका संस्थालाई समेत करदाताको पैसाबाट निरन्तर धान्नुपर्ने अवस्था रहेको बताए।

दुग्ध विकास संस्थानको उदाहरण दिँदै थापाले दैनिक बिक्री ६० लाख रुपैयाँबाट ९० लाख रुपैयाँ पुगेको विषयलाई नाफा बढेको अर्थमा प्रस्तुत गर्न नमिल्ने बताए। किसानको दूध भुक्तानीसम्बन्धी बक्यौता घटेको भए पनि त्यसमा सरकारबाट उपलब्ध गराइएको रकमको भूमिका रहेको उनको भनाइ थियो।