जापानको ‘ईएसडी’ कार्यक्रम : जुलाईमा गरिसक्नुपर्ने सम्झौता हुन सकेन

२४ साउन, काठमाडौं । जापानले विदेशी श्रमिक लैजान सुरु गर्न लागेको नयाँ ‘इम्प्लोयमेन्ट फर स्किल डेभलपमेन्ट’ (ईएसडी) कार्यक्रमका लागि नेपालसँग गर्नुपर्ने सम्झौता हुन सकेको छैन । जापानले पठाएको सम्झौताको मस्यौदामा रहेको सेवा शुल्कसम्बन्धी प्रावधानमा नेपालले सहमति जनाउन नसक्दा सम्झौता प्रक्रिया लम्बिएको हो ।

जापानले नयाँ कार्यक्रम कार्यान्वयनअघि नै नेपाललाई सम्झौता गर्न मस्यौदा पठाएको थियो । नेपाललाई तीन महिनाको समय दिएर सम्झौता टुङ्ग्याउन भनिएको थियो । जुलाईभित्रै सम्झौता गरिसक्नुपर्ने भएपनि अगस्ट लागिसक्दा समेत नेपालले आफ्नो धारणा औपचारिक रूपमा टुङ्ग्याउन सकेको छैन ।