संघर्षले खारिएकी एउटा शक्ति मनिता श्रेष्ठ प्रधान

कहिलेकाहीँ इतिहासका पानाहरू केवल मसीले लेखिँदैनन्, ती त पसिनाले भिजेको म्याटमा पौरखको गर्जनसँगै कोरिएका हुन्छन् । कडा नियम र क्षणभरको चुकले हार–जित तय हुने जुडोको संसारमा मनिता श्रेष्ठ प्रधान एउटा नाम मात्र होइन, एउटा उदाहरण बनेकी छिन् । माइनस ५७ केजी तौल समूहकी यी जुडो खेलाडी कदमा सानी देखिन्छिन्, तर उनको अदम्य साहस र अनुशासनले उनलाई हिमालभन्दा अग्लो बनाएको छ । विश्वका ठूला रंगशालामा नेपालको रगत र पसिनाको मूल्य प्रमाणित गर्ने मनिताले आज नेपाली महिलाका लागि ‘असम्भव’ भन्ने शब्दलाई म्याटमै पछारिदिएकी छिन् ।

पूर्वी नेपालको पहाडी जिल्ला पाँचथर, जहाँका भिराला पाखाहरूले दुःखका अनगन्ती सुस्केराहरू लुकाउँछन् र जहाँका मानिसहरूको धैर्यले पहाडलाई पनि चुनौती दिन्छ, त्यही माटोमा सन् १९९९ मा मनिताको जन्म भयो । तर, उनको बाल्यकाल सुखसयलले सुसज्जित थिएन । जीवनले उनलाई कलिलो उमेरमै यस्ता कठोर र निर्मम प्रश्नहरू सोध्यो, जसको उत्तर खोज्न ठूला–ठूला मानिसहरू पनि डगमगाउँछन् । ‘प्रिजनर्स असिस्टेन्स मिसन’ (पीएम) को छहारीमा हुर्कनुपर्ने विवशतालाई मनिताले कहिल्यै आफ्नो कमजोरी बनाइनन् । उनले अभाव र वियोगलाई आफ्नो नियति मानेर हार मान्नुको साटो, त्यसैलाई एउटा ऊर्जाको स्रोतमा परिणत गरिन् ।