एमालेको साख जोगाउनै मुस्किल : एकातिर शंकरको स्वीकारोक्ति, अर्कोतिर ओलीको दम्भ !

काठमाडौं । एमालेको परम्परागत जनाधार खस्किँदै गएको पार्टीकै महासचिव शंकर पोखरेलको स्वीकार गरेका छन् । युवा, सहरी मध्यम वर्ग, सुकुम्बासी र प्रवासी नेपाली एमालेसँग टाढिँदै गएको उनको भनाइसँगै पार्टी नेतृत्वमाथि आत्मसमीक्षा, संगठन सुधार र पुस्तान्तरणको दबाब बढेको छ ।

नेपालको राजनीतिमा कुनै समय सबैभन्दा अनुशासित, वैचारिक र शक्तिशाली सङ्गठन मानिने नेकपा (एमाले) अहिले आफ्नो ऐतिहासिक विरासत जोगाउनै धौ–धौ पर्ने मोडमा आइपुगेको छ । देशमा वैकल्पिक राजनीति र ‘पपुलिज्म’को लहर चलिरहँदा एमालेप्रतिको जनविश्वास, विशेष गरी युवा र सहरी मध्यम वर्गमाझ दिनानुदिन खस्कँदो छ ।