राजनीतिमा नयाँ पुस्ताको खबरदारी

समृद्ध नेपाल निर्माण गर्ने जिम्मेवारी कुनै एक नेता, दल वा सरकारको मात्र होइन; यो सम्पूर्ण नागरिकको साझा दायित्व हो।

नेपालको राजनीतिक इतिहास परिवर्तन, संघर्ष, त्याग र जनआन्दोलनहरूको इतिहास हो। राणाशासनदेखि प्रजातन्त्र, पञ्चायत, बहुदलीय व्यवस्था, जनयुद्ध, दोस्रो जनआन्दोलन हुँदै संघीय लोकतान्त्रिक गणतन्त्रसम्म आइपुग्दा नेपाली जनताले अनेकौं राजनीतिक परिवर्तन देखेका छन्। तर, यति धेरै राजनीतिक परिवर्तनका बाबजुद पनि जनताले अपेक्षा गरेको सुशासन, पारदर्शिता, उत्तरदायित्व र समृद्धि अझै पूर्ण रूपमा अनुभूति गर्न पाएका छैनन्। यही यथार्थका बीच आजको नयाँ पुस्ता राजनीतिलाई नयाँ दृष्टिकोणबाट हेर्न थालेको छ। उनीहरू राजनीतिक दल, नेता र राज्यका प्रत्येक गतिविधिलाई नजिकबाट नियालिरहेका छन्। यो परिवर्तन लोकतन्त्रका लागि सकारात्मक संकेत हो।