हालकै गतिमा गए राष्ट्रिय गौरवका आयोजना सम्पन्न हुन दश वर्ष लाग्ने उपसमितिको निष्कर्ष

काठमाडौँ । राष्ट्रिय गौरवका आयोजनाहरूको निर्माण हालकै सुस्त गतिमा अघि बढेमा ती आयोजना सम्पन्न हुन अझै कम्तीमा १० वर्ष लाग्ने देखिएको छ। पूर्वाधार विकास समितिअन्तर्गतको राष्ट्रिय गौरवका आयोजना अध्ययन उपसमितिले तयार पारेको प्रतिवेदनले यस्तो निष्कर्ष निकालेको हो।

बजेटको स्रोत सुनिश्चितता, जग्गा प्राप्ति, रुख कटान तथा काम गर्ने समयको कमीलगायत विभिन्न नीतिगत समस्याका कारण राष्ट्रिय गौरवका आयोजनाहरूको काम समयमा नै सम्पन्न हुन नसकेको उपसमितिका संयोजक श्रीराम न्यौपानेले जानकारी दिएका छन्। उनका अनुसार राष्ट्रिय गौरवका आयोजनाहरू निर्माण सुरु भएको करिब १५ वर्ष पुग्दा पनि तिनको औसत प्रगति करिब ५५ प्रतिशत मात्रै रहेको छ।