कम्युनिस्ट शैलीको शासन

विगतका पुराना राजनीतिक दलहरूले आफूहरूलाई एकसे एक सच्चा कम्युनिस्ट भन्दै र भनाउँदै आए । बितेका करिब तीन दशक समयसम्म नेपाली जनताले उनीहरूका कम्युनिस्ट भनाइ र गराइका बीचको तदात्म्यता कहाँनेर छ होला भनेर पत्ता लगाउने कोशिश धेरैतिरबाट गरे । तर धेरै प्रयास गर्दा पनि त्यो तादात्म्यता फेला पार्न सकेनन् । शुरुमा सच्चा कम्युनिस्ट ठानिएका राजनीतिक दललाई पछि गएर मनले नपत्याए पनि तिमीहरू सच्चा कम्युनिस्ट होइनौ, केवल खोल ओढेर जनतालाई छक्याउने धोकबाज कम्युनिस्ट मात्र हौ भन्न मन लागेको थियो ।

यद्यपि यिनीहरूको खोले कम्युनिस्ट रवैयाको शासन कति लामो चल्ने हो ? भोलिका दिनमा यिनीहरूकै शासन र यिनैले बनाएको कानुनको घेरोमा बाँच्नुपर्ने कुरा ठानेर खुलस्तरुपमा विरोध गरी शत्रुता मोल्न चाहेनन् । बरु त्यसको साटो आफूलाई आफैँभित्र धैर्यधारण गर्न सिकाए । जनताले देखेको सपना इँटाभट्टामा जिउँदै निर्दोष मान्छे जलाएर मार्न लगाउने राजनीतिको खोल ओढेको व्यक्ति होस् कि राज्यको अर्बौं सम्पत्ति गैरकानुनी तबरले आफ्नो बनाएर रमाउने अपराधी मानसको रोगी व्यक्ति होस्, ती सबैलाई न्यायको कठघरामा कुनै कालखण्डको शासकले ल्याउन सक्ला कि नसक्ला ? भनेर धेरै नै चिन्ता लागेको थियो ।