सरकारले सार्वजनिक गर्‍यो रोड टु फाइभजीको मस्यौदा, २०३५ सम्म देशका कुनाकुनामा फाइभजी सेवा !

काठमाडौं । नेपालमा नवीन प्रविधिको फाइभजी सेवा भित्र्याउन र मोबाइल ब्रोडब्यान्ड सेवाको गुणस्तर सुधार गर्न सरकारले औपचारिक रूपमा गृहकार्य थालेको छ । नियामक नेपाल दूरसञ्चार प्राधिकरणले ‘मोबाइल ब्रोडब्यान्ड इन्हान्समेन्ट प्लान (नेपाल्स रोड टु फाइभजी)’ को मस्यौदा सार्वजनिक गर्दै यसमा सरोकारवाला र सर्वसाधारणसँग सुझाव मागेको हो ।

देशको दूरसञ्चार बजारको वर्तमान अवस्था, बढ्दो डेटा माग र अन्तर्राष्ट्रिय अभ्यासलाई मध्यनजर गर्दै तयार पारिएको यो मार्गचित्रमा आगामी १० वर्षभित्र देशभर फाइभजी पुर्‍याउने लक्ष्य राखिएको छ । प्राधिकरणले यो मस्यौदा उपर कुनै राय, सुझाव वा सल्लाह भए १५ दिनभित्र उपलब्ध गराउन सूचना जारी गरेको छ । इच्छुक व्यक्ति वा संस्थाले प्राधिकरणको कान्तिपथस्थित कार्यालय वा ईमेल [email protected] वा [email protected] मार्फत आफ्ना सुझाव पठाउन सक्नेछन् ।