गण्डकी सरकारले वितरण गरेको खेलकुद पदकमा विवाद, छानबिन गर्न समिति गठन

पोखरा । गण्डकी प्रदेश सरकारले वितरण गरेको खेलकुद पदक विवादमा आएपछि छानबिन समिति गठन भएको छ । सामाजिक विकास, युवा तथा खेलकुद मन्त्रालयका सचिव डा.शेषनारायण पौडेलको संयोजकत्वमा ३ सदस्यीय समिति गठन भएको हो । समितिको सदस्यमा मन्त्रालयकै खेलकुद क्षेत्र हेर्ने घनश्याम पौडेल र नारायण बास्तोला छन् । साउन २९ गतेभित्र समितिले प्रतिवेदन मन्त्रीलाई बुझाउनुपर्ने म्याद छ ।

खेलकुद मन्त्री रेखा गुरुङले समितिले यथाशक्य छिटो प्रतिवेदन बुझाउने बताइन् । ‘सदस्य सचिवका कारणले विवाद सिर्जना भएको छ । मुख्यमन्त्री ज्यूको पनि गम्भीर ध्यानाकर्षण भएको छ,’ उनले भनिन्, ‘सम्बन्धित खेलाडीले पनि विरोध गरेका कारण छानबिन गर्नुपर्छ भनेर समिति गठन गरेका छौँ ।’