आफ्नो कमजोरीको दोष शासकीय स्वरूपलाई नथोपरौँ, व्यवस्थामाथि धावा बोल्नु गलत : आङ्देम्बे

काठमाडौँ । प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेले मुलुकको वर्तमान शासकीय स्वरूप र सङ्घीयतामाथि प्रश्न उठाउने प्रवृत्तिप्रति आपत्ति जनाएका छन् । ६८ औँ संसद् दिवसका अवसरमा सिंहदरबारमा मंगलबार आयोजित कार्यक्रममा नेता आङ्देम्बेले राजनीतिक नेतृत्वको अकर्मण्यता र कमजोरीको दोष व्यवस्थालाई थोपर्नु राजनीतिक अपरिपक्वता भएको बताए ।

आङ्देम्बेले अहिलेको शासकीय स्वरूपमाथि धावा बोल्ने कोसिस भइरहेको भन्दै यसले राम्रो संकेत नगर्ने चेतावनी दिए । ‘हाम्रो आफ्नै अकर्मण्यता, सोचको अपरिपक्वता र कमजोरीको दोष हामीले शासकीय स्वरूपलाई थोपरिरहेका छौँ। यो व्यवस्थालाई राम्रोसँग नबुझी र पूर्ण रूपमा अभ्यास नै नगरी प्रश्न उठाउनु किमार्थ उचित हुँदैन,’ उनले भने ।