इक्रा नेपालको चेतावनी : नेपाली बैंकिङ क्षेत्र दबाबमा, खराब कर्जा १० वर्षकै उच्च बिन्दुमा

काठमाडौं– नेपाली बैंकिङ क्षेत्रमा केही बहुराष्ट्रिय तथा स्थापित बैंकहरू वित्तीय रूपमा बलिया देखिए पनि अधिकांश बैंकहरू खराब कर्जा, कमजोर पुँजी कोष र घरजग्गा बजारको मन्दीका कारण गम्भीर दबाबमा परेका छन्। इक्रा नेपालले सार्वजनिक गरेको ‘नेपाली बैंकिङ क्षेत्र : कार्यसम्पादन अद्यावधिक र आगामी अवस्था’ प्रतिवेदनले बैंकिङ प्रणालीमा जोखिम तीव्र रूपमा बढिरहेको संकेत गरेको हो।

प्रतिवेदनअनुसार स्ट्यान्डर्ड चार्टर्ड बैंक नेपाल ‘त्रिपल ए’ रेटिङसहित सबैभन्दा सुरक्षित बैंक बनेको छ भने नेपाल एसबीआई बैंक ‘डबल ए’ रेटिङका साथ दोस्रो स्थानमा छ। नबिल बैंक, नेपाल बैंक र नेपाल इन्भेस्टमेन्ट मेगा बैंक अझै सुरक्षित श्रेणीमा रहे पनि केही चुनौती देखिएको उल्लेख गरिएको छ।