वैज्ञानिक सेवा शुल्क र हवाई भाडा नियमनको माग गर्दै वैदेशिक रोजगार व्यवसायीको विभागमा धर्ना

काठमाडौं– विभिन्न माग अघि सार्दै वैदेशिक रोजगार व्यवसायीहरूले सोमबार वैदेशिक रोजगार विभागको कार्यालयअगाडि धर्ना दिएका छन्। नेपाल वैदेशिक रोजगार व्यवसायी सङ्घको नेतृत्वमा ताहाचालस्थित विभागको मूल गेटमा भेला भएका व्यवसायीहरूले नाराबाजीसहित प्रदर्शन गर्दै विभागको ध्यानाकर्षण गराएका हुन्। व्यवसायीहरूले ‘वैज्ञानिक सेवा शुल्क’ तत्काल लागू गर्नुपर्ने, अन्तर्राष्ट्रिय उडानको हवाई भाडामा भएको अस्वाभाविक वृद्धि नियन्त्रण गर्नुपर्ने तथा वैदेशिक रोजगार व्यवसायीमाथि राज्यको दमन बन्द गर्नुपर्ने माग राखेका छन्। धर्नामा सहभागीहरूले ‘वैज्ञानिक सेवा शुल्क लागू गर’, ‘हवाई भाडा नियमन गर’, ‘वैदेशिक रोजगार बाध्यता होइन, आवश्यकता हो’, ‘वैदेशिक रोजगार व्यवसायीको सम्मान गर’ र ‘अर्थतन्त्रमा योगदान दिने व्यवसायीको सम्मान गर’ लगायतका नारा लेखिएका प्लेकार्ड प्रदर्शन गरेका थिए। आन्दोलनरत व्यवसायीहरूका अनुसार सरकारले लागू गरेको ‘फ्री भिसा, फ्री टिकट’ नीति व्यवहारमा प्रभावकारी नभएको र यसले व्यवसायीहरूलाई आर्थिक रूपमा मारमा पारेको छ। उनीहरूले लामो समयदेखि वैज्ञानिक आधारमा सेवा शुल्क निर्धारण गर्न माग गर्दै आएका छन्। त्यस्तै अन्तर्राष्ट्रिय उडानको टिकट दरमा भएको निरन्तर वृद्धिले वैदेशिक रोजगारीमा जाने श्रमिक र व्यवसायी दुवैलाई थप समस्या सिर्जना गरेको भन्दै सरकारले तत्काल हवाई भाडा नियमन गर्नुपर्ने उनीहरूको माग छ। धर्नाका क्रममा व्यवसायीहरूले रेमिट्यान्समार्फत मुलुकको अर्थतन्त्रमा ठूलो योगदान पुर्‍याउँदै आएको क्षेत्रलाई राज्यले सकारात्मक दृष्टिकोणले नहेरेको र उल्टै दमन गर्ने प्रवृत्ति देखिएको गुनासो गरे। उनीहरूले आफ्ना मागहरू शीघ्र सम्बोधन नभए आन्दोलनलाई थप सशक्त बनाउने चेतावनी दिएका छन्। यता विभागका अधिकारीहरूले व्यवसायीहरूले उठाएका विषयमा छलफल भइरहेको र निकास निकाल्ने प्रयास जारी रहेको बताएका छन्।

प्रतिक्रिया दिनुहोस्