आजको मौसम: देशका केही स्थानमा मेघगर्जनसहित भारी वर्षाको सम्भावना

काठमाडौँ। हाल देशभर मनसुनी वायुको प्रभाव रहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा नेपालको पश्चिम भू-भागमा सरदरभन्दा केही उत्तरतर्फ (नेपाल नजिक) तथा पूर्वी भू-भागमा सरदर स्थानको आसपास रहेको छ।

आज दिउँसो गण्डकी, लुम्बिनी, कर्णाली र सुदूरपश्चिम प्रदेशसहित कोशी र बागमती प्रदेशका हिमाली तथा पहाडी भू-भागमा साधारणतया बदली रहनेछ भने मधेश प्रदेश र बाँकी तराई भू-भागमा आंशिक बदली रहनेछ। देशका हिमाली भू-भागका केही स्थानमा मेघगर्जन र चट्याङसहित मध्यम वर्षा वा हिमपातको सम्भावना छ।