राजनीतिका घुमाउरा र फोहोरी मोडहरू

राजनीतिमा स्पष्ट दृष्टिकोण भएका व्यक्तिले कुनै पनि प्रकारका राजनीतिक अखेटाहरू सिर्जना गर्न खोज्दैनन् र अखेटा सिर्जना नभइदिए हुन्थ्यो भन्ने सोचाइ बनाउँछन् । त्यस्ता मान्छेहरू आफ्नो राजनीतिक यात्राको क्रममा जतिसुकै प्रकारका अवरोध आएर बाटो अवरोध गरे पनि विभिन्न उपाय लगाएर ती अखेटा वा अवरोधबाट उम्कन सफल हुन्छन् । तर स्पष्ट राजनीतिक दृष्टिकोण नभएका र होहोरेका भरमा राजनीतिमा लागेका मानिसहरूले विभिन्न राजनीतिक अखेटा सिर्जना गरेर अनन्त कालसम्म जनतालाई तिनै अखेटाहरूमा बिसाउँदै र सान्तवनाका अमृत वचन सुनाउँदै आफूहरूलाई केन्द्रविन्दुमा अड्याएर राख्न खोजेका हुन्छन् ।

यी अखेटालाई राजनीतिको भाषामा राजनीतिक भुलभुलैया भनिन्छ । राजनीतिक भुलभुलैया बनाउन सक्नु भनेको राजनीतिको नाममा कालो खेल खेल्नु वा कपटी खेल खेल्नुजस्तै हो । कानुनी भाषामा भन्ने हो भने यो एउटा आपराधिक मनोवृत्तिबाट उत्पन्न भएको पाप कर्म हो । पुरानो इतिहासको पाना पल्टाउनुको साटो त्यही १०४ बर्से राणा शासनले धर्मको, राजनीतिको भुलभुलैयामा राखेर १०४ वर्षसम्म नेपाली जनताको उन्नतिको पाइला अगाडि बढाउने बाटोमा अवरोध सिर्जना गरेर रह्यो ।