‘सरकारी निर्णय र सूचनामा सञ्चारमाध्यमको सहज पहुँच सुनिश्चित गरियोस्’

काठमाडौँ। सरकारका प्रवक्ता तथा शिक्षा तथा खेलकुदमन्त्री सस्मित पोखरेलले विभिन्न सञ्चारमाध्यमका सम्पादक तथा प्रतिनिधिसँग छलफल गरेका छन्। मन्त्रालयमा सोमबार आयोजित छलफलमा सरकारी सूचना प्रवाहलाई पारदर्शी, सहज र प्रभावकारी बनाउँदै सरकार र सञ्चारमाध्यमबीचको सम्बन्ध थप सुमधुर बनाउनुपर्नेमा जोड दिइएको हो।

छलफलमा सहभागी विभिन्न सञ्चारमाध्यमका सम्पादक तथा प्रतिनिधिहरूले प्रधानमन्त्री तथा अन्तरमन्त्रालयका गतिविधिसहित सरकारी निर्णय र सूचनामा सञ्चारमाध्यमको सहज पहुँच सुनिश्चित गर्नुपर्ने बताए। उनीहरूले मन्त्रालयले रणनीतिक महत्त्वका नीतिगत निर्णय गर्दा सरोकारवालासँग पर्याप्त छलफल र राय-सुझाव लिनुपर्ने बताए। यसबाट नीतिगत निर्णयको स्वीकार्यता, गरिमा र दिगोपना बढ्ने उनीहरूको भनाइ थियो।