'प्रधानमन्त्रीको अभिव्यक्तिपछि ज्यादती बढ्यो', पहिचान र जमिनको सुरक्षा माग्दै सुस्ताबासी राजधानीमा गुहार

काठमाडौँ । नेपाल–भारत सीमा क्षेत्रमा पर्ने नवलपरासी (बर्दघाट सुस्ता पश्चिम) को सुस्ताका स्थानीय बासिन्दाहरू आफ्नो जायज माग र सुरक्षाको खोजी गर्दै सङ्घीय राजधानी काठमाडौँ आइपुगेका छन् । नेपाली नागरिकता र वर्षौँदेखि भोगचलन गर्दै आएको जमिनको लालपुर्जा माग गर्दै उनीहरूले आजदेखि काठमाडौँको माइतीघर मण्डलामा शान्तिपूर्ण धर्ना सुरु गर्ने भएका छन् ।

सीमा विवादका विषयमा नेपाल सरकारका प्रधानमन्त्री र मन्त्रीहरूले सार्वजनिक रूपमा दिएको अभिव्यक्तिलगत्तै भारतीय सुरक्षाकर्मी (एसएसबी) बाट आफूहरूले झन् बढी दुःख र सास्ती पाउन थालेको सुस्ताबासीको गुनासो छ ।