आगामी तीन दिन नदीमा बहाव बढ्ने, पाँच जिल्लामा आकस्मिक बाढीको जोखिम

काठमाडौं– आगामी तीन दिन देशका प्रमुख नदीहरूमा पानीको बहाव उल्लेख्य रूपमा बढ्ने पूर्वानुमान गरिएको छ। बाढी पूर्वानुमान महाशाखाले आजदेखि नदीहरूको बहाव बढ्ने भएकाले नदी तटीय क्षेत्रका बासिन्दालाई सतर्क रहन आग्रह गरेको छ।

महाशाखाका अनुसार आज बिहान ८ बजेको मापनमा कोशी, नारायणी, बागमती, कर्णाली, महाकाली तथा तिनका सहायक नदीमा पानीको सतह सतर्कता तहभन्दा तल रहेको छ। कन्काई, कमला, बबई तथा पूर्वी र पश्चिम राप्ती नदीको बहाव पनि हाल सामान्य अवस्थामा छ।