सहरमा पनि बाँदर आतंक

कोहलपुर चौराहका पसलमा अहिले ग्राहकसँगै बाँदर पनि आउँछन्। फरक यत्ति हो, ग्राहकले पैसा तिरेर सामान लैजान्छन्, बाँदर भने मौका पाउनासाथ सामान उठाएर भाग्छन्। फलफूल व्यवसायी बुधराम यादवको पसलमा केही दिनअघि पाँच/सात वटा बाँदर पसे र आँप बोकेर भागे। अहिले प्रतिकिलो चार सय रुपैयाँ पर्ने आँप पसलबाट बाँदरले लैजानु उनका लागि नयाँ घटना होइन। यहाँका पसलमा दिनहुँजसो बाँदर आतंक देख्न पाइन्छ।

यादवका लागि पसलमा बाँदर पस्नु हैरानीको विषय बनेको छ। ग्राहकलाई फलफूल बेच्न लाग्दा पसलमा बाँदर पसेपछि उनी ग्राहक छाडेर बाँदर धपाउन दौडिन्छन्। ‘ग्राहकलाई सामान दिने कि बाँदर धपाउने भन्ने हुन्छ,’ उनी भन्छन्, ‘अलिकति ध्यान पुगेन भने बाँदरले पसलमा पसेर सामानको सोत्तर लगाउँछन्।’