सडकबाट हटाइएका दृष्टिविहीन व्यवसायी नौ दिनदेखि धर्नामा

काठमाडौँ । सडक पेटीलाई कार्यक्षेत्र बनाएर स्वरोजगारमूलक कार्य गर्दै आएका दृष्टिविहीन तथा न्यून दृष्टियुक्त व्यवसायीहरू विगत नौ दिनदेखि काठमाडौँको माइतीघर मण्डलामा धर्नामा बसेका छन्। सरकारले सडकमा व्यवसाय गर्न नदिएपछि जीविकोपार्जनमा समस्या आएकाले बाध्य भएर धर्ना सुरु गर्नुपरेको उनीहरूले बताए।

सरकारले दृष्टिविहीन व्यवसायीहरूको उचित व्यवस्थापन गर्नुपर्ने, योग्यता र क्षमताका आधारमा रोजगारी दिनुपर्ने वा हाल गर्दै आएको स्वरोजगार तथा सडक संगीतजस्ता पेसालाई निर्वाध रूपमा गर्न दिनुपर्ने उनीहरूको मुख्य माग छ। राज्यले वेवास्ता गर्दा पनि आफैँ विभिन्न पेसा व्यवसाय गरेर बाँचिरहेका नागरिकमाथि सरकार तगारो बनेर उभिएको उनीहरूले गुनासो गरे।