चन्द्रमामा चीनको पहुँच विस्तार, किन चिन्तित छ अमेरिका ?

दशकौँदेखि पृष्ठभूमिमा चलिरहेको चीन र अमेरिकाबिचको शक्ति प्रतिस्पर्धा अहिले अन्तरिक्षमा पनि स्पष्ट देखिन थालेको छ । चीनले अन्तरिक्ष प्रविधिमा तीव्र प्रगति गरिरहेको छ भने अमेरिकाले पनि अन्तरिक्षमा आफ्नो प्रभाव कायम राख्नुपर्ने आवश्यकता जोड दिइरहेको छ ।

पछिल्ला पाँच वर्षमै चीनले अमेरिकाको नेतृत्वमा रहेको पुरानो अन्तर्राष्ट्रिय अन्तरिक्ष स्टेसनको विकल्पका रूपमा आधुनिक अन्तरिक्ष प्रयोगशाला ‘तियानगोङ’ सञ्चालनमा ल्याएको छ । चीनले चन्द्रमाको पृथ्वीबाट नदेखिने भागबाट माटो र चट्टानका नमुना पनि ल्याइसकेको छ । यस्तो उपलब्धि हासिल गर्ने चीन पहिलो देश हो । तर अमेरिकालाई सबैभन्दा बढी चिन्तित बनाएको विषय चीनको सन् २०४० सम्म चन्द्रमामा स्थायी बस्ती बनाउने योजना हो । अमेरिकी सांसदहरूले यसलाई नयाँ ‘अन्तरिक्ष दौड’का रूपमा हेरेका छन् । अमेरिकाले पनि चन्द्रमामा आफ्नै आधार निर्माण गर्ने योजना अघि सारेको छ ।