विदेशमा रहेका नेपालीलाई मताधिकार दिलाउन अध्ययन समिति गठन गरिने

काठमाडौँ। विदेशमा रहेका नेपाली नागरिकलाई मतदानको अधिकार सुनिश्चित गर्ने उद्देश्यले निर्वाचन आयोगले कानुनी तथा सूचना प्रविधिसम्बन्धी सुधारको अध्ययन गर्न दुई छुट्टाछुट्टै समिति गठन गर्ने निर्णय गरेको छ।

आयोगको बुधबार बसेको बैठकले विदेशमा रहेका नेपालीको मताधिकार सुनिश्चित गर्न आवश्यक कानुनी व्यवस्था र सूचना प्रविधिको प्रयोगबाट निर्वाचन प्रक्रियालाई थप सुरक्षित, पारदर्शी, प्रभावकारी, समावेशी तथा विश्वसनीय बनाउने विषयमा अध्ययन गरी प्रतिवेदन तयार गर्न समिति गठन गर्ने निर्णय गरेको हो।